最強博彩盤路過關神器《串績王》：http://win.on.cc/football/
烏克蘭喺今屆歐國盃分組賽，掹車邊以第4支小組最佳第3名身份出線，不過周三(30日)凌晨淘汰瑞典殺入8強後，成功改寫烏克蘭足球歷史。烏克蘭歷來第2次喺國際大賽殺入8強，而2次嘅男主角都係「核彈頭」舒夫真高！
今屆係烏克蘭第3次出戰歐國盃決賽周，2012年同2016年都係分組賽出局，今屆殺入淘汰賽已經係最好成績，依家更進一步闖入8強，亦係烏克蘭自2006年世界盃後，第2次躋身國際大賽8強。烏克蘭喺06世界盃嘅王牌球星，正正就係今屆領隊舒夫真高，呢位44歲教頭踢波同領軍一樣咁掂！
舒夫真高賽後興奮表示：「好多謝球員交出英雄式嘅表現，佢哋絕對值得得到全國人民嘅愛戴，我哋由第1分鐘已經貫徹執行比賽計劃，發揮自己嘅長處，所有人都做得好好。」對於8強面對英格蘭，舒夫真高就話：「我睇晒英格蘭3場分組賽，佢哋係支難以被擊敗嘅球隊，但英格蘭嘅強大唔會嚇怕我哋，只會令我哋更加有鬥志，希望帶畀球迷更多歡樂。」